Okabe (1466m)

EGUNA: 2023/03/01

ABIAPUNTUA: Chalet Pedro (991m)

ZAILTASUNA: S2

DENBORAK:

• Chalet Pedro - Okabe : Ordu eta erdi
• Okabe - Nekexareko etxola : 15 minutu
• Nekexareko etxola - Oraateko lepoa : Ordu bat
• Oraateko lepoa - Chalet Pedro : Ordu bat

NOLA AILEGATU:

 Iratira joateko Donibane Garazitik Donazaharrera joanen gara eta hemendik Iratiko ipar eskiko pistak dauden ingurura igotzen den errepidea hartu behar da. Burdinkurutzetako mendatea igo eta bertze aldera jaitsiko gara, Bagargiko lepoa ezkerretara utzi eta zuzen segituko dugu Chalet Pedro jatetxearen aparkalekuraino.

ARRASTOA:

Powered by Wikiloc

KRONIKA:

9:28 : Chalet Pedro (991m)

Ordubete eskasean etxetik abiapuntuan ginen. Autoa utzi eta GR10aren bideari segituz abiatu ginen.

GR markek basoaren artetik doan pista batetik eramaten gaituzte. Lehen oihan zati baten ondotik zati ireki batera aterako ginen...

Altuera irabazi ahala arboletan oraindik elurra aurkituko genuen.

Igoeraren bigarren zatia aise etzanagoa da eta zuhaitzak bakanduz joaten dira mantso-mantso...

Soilgune honetatik gailurra ikusten zen.

Berriz baso zatitxo bat zeharkatu genuen...

...behingoz larre zabaletara ateratzeko. Parean ikusten den malda hori iganen genuen segidan.

Puntu honetan GRaren markak utzi eta hegoaldera biratuko ginen kaskoaren bila.

Gailur inguruan goi-lautada zabal bat dago.

Azken metroak arras etzanak dira ikusten den bezala.

10:37 : Okabe (1466m)

Gailurrean ez ginen aunitzik egon, tenperatura arras hotza baitzen. 

Lehen jaitsiera mendiaren hego-mendebaldeko maldak bilatuz egin genuen. 400 bat metroko jaitsiera polita da Nekexareko etxolaraino.

11:12 : Nekexareko etxola (1053m)

Etxolaren ondoan berriz ere foka-larruak paratu eta ailegatutako bidetik itzuliko ginen.

Zeta zabalak marraztuz igan genuen jaitsitako malda ederra. 

Gailurreraino itzuli ordez, GRT09 bidea pasatzen den pistan eskuinetara ginen eta Oraateko lepo aldera zuzendu ginen.

12:05 : Oraateko lepoa (1307m)

Lepotik bigarren jaitsiera eginen genuen Iratiko errekaraino. Lehen zatia baso batetik egin genuen eta gero pista zabalari segituz.

12:29 : Iratiko erreka / D18 errepidea (950m)

Errekaraino jaitsita, fokak berriz paratu eta elurtutako errepidetik goiti autoraino itzultzea bertzerik ez zen gelditzen.

13:03 : Chalet Pedro (991m)

Bizi-bizi igan genuen 2'5 km inguruko tartea eta hala akitu genuen Okabe mendiaren inguruan egindako eski ateraldi polita.